Shahnaz Muzammil
miri tarah se kahin ḳhaak chhanta hoga
vo apni zaat ke sahra men kho gaya hoga
sharar raakh men baaqi raha nahin koi
charagh dil ka mire jal ke bujh gaya hoga
jo meri jhiil si ankhon men Duub Duub gaya
sitara-var kahin ḳhud ko DhunDhta hoga
phir aaj qarya-e-jan par azaab utre hain
kisi ne phir naya tarkash saja liya hoga
chhalakte jaate hain manzar tamam ankhon se
daricha yaad ka shayad koi khula hoga
sama.aton pe miri aaj kaisi dastak hai
koi hava se pata mera puchhta hoga
vo shaḳhs mera shanasa nahin to kaun hai vo
kisi ko DhunDhta rasta bhaTak gaya hoga
nafas nafas men koi ashkar hota hai
jo mere dil ke qarin hai mira ḳhuda hoga
tiri talash men vo muntashir hua aisa
suragh apna bhi us ko na mil saka hoga
badalti rut men vo kaisa badal gaya ‘shahnaz’
bichhaḌ ke mujh se kabhi vo bhi sochta hoga
Leave a Reply