miri shanaḳht ke har naqsh ko miTata hai
vo mere saa.e ko mujh se juda dikhata hai
bas ek pal men miTa dengi sar-phiri maujen
gharaunde ret ke sahil pe kyon banata hai
faza men kamre ki phaili hui hai ik ḳhushbu
ye kaun aa ke kitaben miri sajata hai
yahi mila hai sila mujh ko haq-parasti ka
ki vaqt neze pe sar ko mire uThata hai
main us ke ishq men aise maqam par huun jahan
usi ka aks har ik a.ina dikhata hai
Leave a Reply