Naina Adil
miri ḳhushbu mire asrar tujh men
main shamil huun jamal-e-yar tujh men
masiha.i ko jis ki ishq aaya
koi aisa paḌa bimar tujh men
ghubar-e-zat baiThega koi dam
giri hai aḳhiri divar tujh men
fusun-e-shab bhi hai qurban jis par
suḳhan aisa hua bedar tujh men
hava-e-tund hai jalte diye hain
azal se barsar-e-paikar tujh men
tujhe hai aarzu duniya ki lekin
koi duniya se hai bezar tujh men
milan ke giit gaati hai azal se
miri pazeb ki jhankar tujh men
main huun vo shabd jo madum hota
agar paata nahin iz.har tujh men
izafi hain mujhe ye din-o-duniya
mire donon jahan dildar tujh men
Leave a Reply