Poet
meri hasti men miri ziist men shamil hona
tujh ko ai husn mubarak ho mira dil hona
ḳhushk ho jaa.en jo ankhen to gham-e-furqat kya
chahiye aur bhi tar dida-e-bismil hona
us pe mushkil koi paḌ jaa.e to asan ho jaa.e
hausla baḳhshe jise kaam ka mushkil hona
la mira jaam uTha apni surahi saaqi
aaj hai gardish-e-dauran ke muqabil hona
ab kahe jaao fasane miri gharqabi ke
mauj-e-tufan ko mire haq men tha sahil hona
qais laila ki nazar se hi bana tha majnun
us ka achchha hai pas-parda-e-mahmil hona
mast ulfat hon mira naam hai divana-e-husn
kaam hai hosh men aana kabhi ghafil hona
kitni ummid se baḌhte hain musafir ke qadam
qudrati hai gham-e-nakami-e-manzil hona
aaj ke daur men kam baat nahin hai ye ‘falak’
ek fan men kisi insan ka kamil hona
Leave a Reply