meri bala se saari duniya ujḌe ya abad rahe
teri ḳhushbu jis men basi hai vo kamra abad rahe
ashiq aur mashuq ka rishta aur ziyada puḳhta ho
tere zulm-o-jaur salamat dil mera abad rahe
mere ghar ki divaron par barbadi ka qabza hai
teri gali ko jaane vaala har rasta abad rahe
sub.h savere ḳhvab men dekha mujh se koi ye kahta tha
ik tu hi barbad rahe aur jag saara abad rahe
ilm-o-hunar ka markaz hai aur shahr hai ‘jaun’-o-‘nasir’ ka
jab tak chand sitare chamken amroha abad rahe
Leave a Reply