jiine vaala ye samajhta nahin sauda.i hai
zindagi maut ko bhi saath laga laa.i hai
ye bhi mushtaq-ada vo bhi tamanna.i hai
khinch ke duniya tire kuche men chali aa.i hai
khul ga.e naza.a men asrar-e-tilism-e-hasti
ziist kahte hain jise maut ki angḌa.i hai
kah ga.e ahl-e-chaman ye tire divanon se
hosh men aao zamane men bahar aa.i hai
main kisi roz dikha.un dil-e-sad-chak-ada
tujh ko malum to ho kya tiri angḌa.i hai
DhunDhti kyuun na rahe us ko abad tak duniya
jis ne chhupne ki azal hi men qasam khaa.i hai
phuuT kar paanv ke chhale mire laa.e ye rang
baagh to baagh hai sahra men bahar aa.i hai
jalva-e-roz-e-azal ne mujhe bechain kiya
pahli duniya men ye pahli tiri angḌa.i hai
jis ki sehat ke liye aap dua.en mangen
aise bimar ko bhi maut kahin aa.i hai
tegh-e-qatil ko pas-e-qatl nadamat hogi
dam se ‘bismil’ hi ke ye ma.arka-ara.i hai
Leave a Reply