‘bedil’ ka taḳhayyul huun na ghalib ki nava huun
is qafila-e-rafta ka naqsh-e-kaf-e-pa huun
raqsan hai charaghan-e-tamanna mire harsu
vo raushaniyan hain ki main saa.e se juda huun
jab dasht-e-alam se koi jhonka kabhi aaya
main lala-e-ḳhud-rav ki tarah aur khila huun
zulmat-aman bhi huun ujalon ka amiin bhi
main sub.h ke taare ki tarah Duub raha huun
aflak-rasi se bhi talafi nahin hoti
kis azm ki an-dekhi chaTanon se gira huun
har aks-e-muqabil se numayan hai mira naqsh
duniya men huun ya a.ina-ḳhane men khaḌa huun
mahdud hai kyuun hadd-e-talab tak miri parvaz
main mauj-e-saba ho ke bhi zanjir-ba-pa huun
idrak ke sho.alon ka chaman hai mira ahang
main barg-e-ḳhizan ho ke bhi gulzar-numa huun
ehsas ke ghunchon ki chaTak hai miri avaz
main sina-e-afaq men dhaḌkan ki sada huun
har chand ki nas nas men nihan barq-e-tapan hai
khul kar bhi barasta huun ki ghanghor ghaTa huun
ek ek kiran men tire sau rang nazar aa.e
jab pichhle pahar chand ke hamrah chala huun
ik naghma-e-rangin huun lab-e-saz-e-mizha par
‘sadiq’ jaras-e-ghuncha huun tasvir-e-sada huun
Leave a Reply