mire rog ka na malal kar mire charagar
main baḌa hua ise paal kar mire charagar
sabhi dard chun mire jism se kisi ism se
mira ang ang bahal kar mire charagar
mujhe si de sozan-e-dard rishta-e-zard se
mujhe zabt-e-gham se bahal kar mire charagar
mujhe chiir nashtar-e-ishq soz-e-sarishk se
mira indimal muhal kar mire charagar
ye badan ke aarzi ghaav hain unhen chhoḌ de
mire zaḳhm-e-dil ka ḳhayal kar mire charagar
faqat ek qatra-e-ashk mera ilaaj hai
mujhe mubtala-e-malal kar mire charagar
main jahan-e-dard men kho gaya tujhe kya mila
mujhe imtihan men Daal kar mire charagar
mujhe apne zaḳhm ki ḳhud bhi koi ḳhabar nahin
so na mujh se koi saval kar mire charagar
tira haal dekh ke ro.ega tira charagar
mira dil na dekh nikal kar mire charagar
Leave a Reply