mire pichhe ye to muhal hai ki zamana garm-e-safar na ho
ki nahin mira koi naqsh-e-pa jo charagh-e-rahguzar na ho
rukh-e-tegh se jo na ho kabhi sahar aisi koi nahin miri
nahin aisi ek bhi shaam jo tah-e-zulf-e-dar basar na ho
mire haath hain to lunga khud main ab apna saqi-e-mai-kada
khum-e-ghair se to khuda kare lab-e-jam bhi mira tar na ho
main hazar shakl badal chuka chaman-e-jahan men sun ai saba
ki jo phuul hai tire haath men ye mira hi lakht-e-jigar na ho
jinhen sab samajhte hain mehr o mah na hon sirf chand nuqush-e-pa
jise kahte hain kurra-e-zamin faqat ek sang-e-safar na ho
tire pa zamin pe ruke ruke tira sar falak pe jhuka jhuka
koi tujh se bhi hai azim-tar yahi vahm tujh ko magar na ho
shab-e-zulm nargha-e-rahzan se pukarta hai koi mujhe
main faraz-e-dar se dekh luun kahin karvan-e-sahar na ho
Leave a Reply