mire ḳhuda kisi surat use mila mujh se
mire vajud ka hissa na rakh juda mujh se
vo na-samajh mujhe patthar samajh ke chhoḌ gaya
vo chahta to sitare tarashta mujh se
us ek ḳhat ne suḳhnavar bana diya mujh ko
vo ek ḳhat ki jo likkha nahin gaya mujh se
use hi saath gavara na tha mira varna
kise majal koi us ko chhinta mujh se
abhi visal ke zaḳhmon se ḳhuun rista hai
abhi ḳhafa hai mohabbat ka devta mujh se
hai aarzu ki palaT ja.un asman ki taraf
mizaj ahl-e-zamin ka nahin mila mujh se
ḳhata ke ba.ad ajab kashmakash rahi ‘shahid’
ḳhata se main raha sharminda aur ḳhata mujh se
Leave a Reply