mere ham-rah mire ghar pe bhi aafat aa.i
asman TuuT paḌa barq giri chhat aa.i
sharm aa.i bhi jo us shoḳh ki ankhon men kabhi
shoḳhiyan karti hui saath shararat aa.i
hijr men jaan hai dubhar ye likha tha un ko
ḳhat men likkhi hui marne ki ijazat aa.i
sochta jaata huun raste men ki ye dunga javab
guftugu un se agar ghair ki babat aa.i
phir har ik sher men kuchh dard ka paata huun asar
phir kahin hazrat-e-‘beḳhud’ ki tabi.at aa.i
Leave a Reply