mere bahte ashkon men za.iqa nahin hoga
jab talak talatum men mo.ajiza nahin hoga
sab parind shaḳhon se jaan bacha ke uḌte hain
vo jo mar gaya shayad vo uḌa nahin hoga
asman vaale ḳhud phir tumhen gira denge
gar tumhare shanon par hausla nahin hoga
bas guzarne vaale ka itna dukh to hai mujh ko
ab kabhi kahin us se rabta nahin hoga
ab hamari ghazlon ko raushni nahin milti
vo hamare baare men sochta nahin hoga
raushni hava jaadu sab purane qisse hain
haan tumhari ankhon se kuchh siva nahin hoga
main tiri amanat huun tu meri amanat hai
ye jo vaqt hai ‘sajid’ ye sada nahin hoga
Leave a Reply