mira hi ḳhauf har ik moḌ par mile hai mujhe
navah-e-jan koi aaseb sa lage hai mujhe
main dastan ki tarah har sadi ke zehn men huun
koi likhe hai mujhe aur koi paḌhe hai mujhe
jo mere qad ko andheron men chhoḌ aaya tha
shua-e-zar ki tarah saath le chale hai mujhe
main kya huun kaun huun pahchan men nahin aata
jo jis ke ji men sama.e hai so kahe hai mujhe
main tez-gam jo manzil ki samt baḌhta huun
kisi ki abla-pa.i pukar le hai mujhe
jahan nahin hai vahan bhi hain us ke hangame
har ik maqam se us ki ḳhabar mile hai mujhe
jo ek umr mire roz-o-shab ka sathi tha
koi batao ki vo shaḳhs kya kahe hai mujhe
main apna lahn shuaon ko baanT aaya huun
ye ehtisab abas be-nava kare hai mujhe
yahi libas to pahchan ban gaya hai miri
ye mera ḳhirqa-e-parina hi saje hai mujhe
shajar phala hai to sau haath baḌh rahe hain ‘shakeb’
har ek shaḳh pe apna hi sar lage hai mujhe
Leave a Reply