Mera Dil Dad-KHwah-E-Zulm Aslan Ho Nahin Sakta

Saqib Lakhnavi

mira dil dad-ḳhvah-e-zulm aslan ho nahin sakta

muravvat munh ko si deti hai shikva ho nahin sakta

chhupao aap ko jis rang ya jis bhes men chaho

magar chashm-e-haqiqat-bin se parda ho nahin sakta

tamasha-gah-e-hairat hai dayar-e-dil ki virani

ye sannaTa miyan-e-dasht-o-sahra ho nahin sakta

baḌha ek aur gham ifsha-e-raz-e-ishq se varna

na main khulta na vo kahte ki aisa ho nahin sakta

mire zulmat-kade men roz-e-raushan ka guzar kaisa

salamat hai shab-e-gham to ujala ho nahin sakta

dam-e-ahd-o-vafa Thahra na un ke samne koi

siva mere to main kis dil se kahta ho nahin sakta

kabhi kaj-tab.a ko dekha na sidhi raah par aate

jo hai dar-asl bad-batin vo achchha ho nahin sakta

na hon sang-e-dar-e-mai-ḳhana ahl-e-zohd ai ‘saqib’

ki main paband-e-rasm-o-rah-e-taqva ho nahin sakta