ahmad-hamesh

Mehwar

hamari ankhon men jalne vaale nuqush baaqi hain

kaan mausam ki garm aahat se chaunk uthte hain

bhigi mitti ka lams fan ko nikhar deta hai

nursery ke purane gamlon men parvarish ke tamam adab

khuub sajte hain

hava abhi tak hamare pedon ki sard shakhon men sarsarati hai

hont hilte hain

aur gaaek hamare vijdan ki shat aur athah lahron men bah nikalta hai

hamari maasum atmaon ki jot dharti pe jagti hai

hamari mehvar pe ghumti hai

kya hua jo hamari duniya men din ki nafrat

ya shab ka dhoka bhi hadisa hai hamare alfaz ka

na koi tarikh saaton ki

na koi virsa na koi tahzib

sab ghalat hai

mufahamat ke tamam bandhan bikhar chuke hain

hamari ankhen hi dekhti hain

aur koi avaz hamari tarikh ki hikayat se mavara hai

dimagh patthar uga rahe hain

More Poems

Leave a Comment