Hakeem Manzoor
aag jo bahar hai pahunchegi andar bhi
saa.e jal ja.enge aur phir paikar bhi
teri ankhon men aansu bhi dekhe hain
tere hathon men dekha hai ḳhanjar bhi
parakh hai to mujh ko parakh hushyari se
main ik gauhar bhi huun main ik patthar bhi
ḳhvabon men bhi rahta huun bechain bahut
chain nahin milta hai mujh ko so kar bhi
kab tak jang laḌega tere suraj se
sukhega ik din aḳhir ye sagar bhi
shafaq-e-sham ka din bhar tha arman mujhe
ḳhun-aluda nikla hai ye manzar bhi
phuul ki pati bhi hai baar mujhe ‘manzur’
dekhoge to lagta huun ik patthar bhi
Leave a Reply