mehnat se ye maana chuur hain ham
aram se koson duur hain ham
par ladne par majbur hain ham
mazdur hain ham mazdur hain ham
go aafat o gham ke maare hain
ham khaak nahin hain taare hain
is jag ke raj-dulare hain
mazdur hain ham mazdur hain ham
banne ki tamanna rakhte hain
mitne ka kaleja rakhte hain
sarkash hain sar uncha rakhte hain
mazdur hain ham mazdur hain ham
har chand ki hain adbar men ham
kahte hain khule bazar men ham
hain sab se bade sansar men ham
mazdur men ham mazdur hain ham
jis samt badha dete hain qadam
jhuk jaate hain shahon ke parcham
savant hain ham balvant hain ham
mazdur hain ham mazdur hain ham
go jaan pe lakhon baar bani
kar guzre magar jo ji men thani
ham dil ke khare baton ke dhani
mazdur hain ham mazdur hain ham
ham kya hain kabhi dikhla denge
ham nazm-e-kuhan ko dha denge
ham arz-o-sama ko hila denge
mazdur hain ham mazdur hain ham
ham jism men taqat rakhte hain
sinon men hararat rakhte hain
ham azm-e-baghavat rakhte hain
mazdur hain ham mazdur hain ham
jis roz baghavat kar denge
duniya men qayamat kar denge
khvabon ko haqiqat kar denge
mazdur hain ham mazdur hain ham
ham qabza karenge daftar par
ham vaar karenge qaisar par
ham tuut padenge lashkar par
mazdur hain ham mazdur hain ham
Leave a Reply