Zeb Ghauri
mauzu-e-suḳhan himmat-e-ali hi rahegi
jo tarz nikalunga misali hi rahegi
ab mujh se ye duniya mira sar maang rahi hai
kambaḳht mire aage savali hi rahegi
vo nashsha-e-gham ho ki ḳhumar-e-mai-e-pindar
dil valon ke chehre pe bahali hi rahegi
ab tak to kisi ghair ka ehsan nahin mujh par
qatil bhi koi chahne vaali hi rahegi
main laakh ise taaza rakhun dil ke lahu se
lekin tiri tasvir ḳhayali hi rahegi
is dil pe Thaharne ka nahin ‘zeb’ koi naqsh
ye aankh kisi rang se ḳhali hi rahegi
Leave a Reply