maujib-e-rang-e-chaman ḳhun-e-shahidan nikla
maut ki jeb se bhi ziist ka saman nikla
Thokaren khaa.i hain utni ki ab apne dil se
shauq-e-avargi-e-dasht-o-bayaban nikla
ham bahut ḳhush the ki jaag uTThi hai apni qismat
aane vaala kisi hamsa.e ka mehman nikla
hai ajab baat ki jis raste pe ham chal nikle
ghuum phir kar vo sar-e-kucha-e-janan nikla
be-hisi ne jo kabhi fursat-e-gham di ham ko
ek sailab-e-nahufta tah-e-mizhgan nikla
charagar ḳhatra-e-jan kahte the jis ko ‘basir’
vahi gham ba.is-e-aram-e-rag-e-jan nikla
Leave a Reply