Jafar Shirazi
raston men Dher ho kar phuul se paikar gire
barg kitne andhiyon ke paanv men aa kar gire
ai junun ki sa.ato aamad baharon ki hui
dekhna vo shaḳhchon se titliyon ke par gire
tum na sun paa.e sada dil TuTne ki aur yahan
shor vo uTTha zamin par jis tarah ambar gire
kaun jaane kitni yadon se hua dil zaḳhm zaḳhm
chandni barsi ki meri ruuh par ḳhanjar gire
muntazir huun gham ke is tufan-e-abr-o-bad men
kab ghaTa ka shor kam ho kab hava thak kar gire
yuun hua huun jazb ‘ja.afar’ vaqt ke tufan men
tah main gahre paniyon ki jis tarah kankar gire
Leave a Reply