Makhdoom Mohiuddin
gulu-e-yazdan men nok-e-sinan bhi TuuTi hai
kashakash-e-dil-e-paigham-baran bhi TuuTi hai
sarab hai ki haqiqat nazara ki fareb
yaqin bhi TuuTa hai tarz-e-guman bhi TuuTi hai
siyasat-e-dil-a.ina chuur chuur to thi
siyasat-e-dil-e-ahan-garan bhi TuuTi hai
andheri raat ka ye nim-baz sannaTa
gulon ki saans rag-e-gulsitan bhi TuuTi hai
tumhare jism ka suraj jahan jahan TuuTa
vahin vahin miri zanjir-e-jan bhi TuuTi hai
kahan hain alam-e-imkan vajud men aa.en
nazar nazar hi rahi hai jahan bhi TuuTi hai
shikast-o-reḳht zamane ki ḳhuub hai ‘maḳhdum’
ḳhudi to TuuTi thi ḳhu-e-butan bhi TuuTi hai
Leave a Reply