pas-e-sukut suḳhan ko ḳhabar banaya jaa.e
fasil-e-harf men ma.ani ka dar banaya jaa.e
hisab-e-sud-o-ziyan ho chuka bahut ab ke
vufur-e-shauq ko arz-e-hunar banaya jaa.e
lagan uḌaan ki dil men hanuz baaqi hai
kaTe paron hi ko ab shah-par banaya jaa.e
kisi paḌav pe pahunchenge jab to sochenge
abhi se kya koi zad-e-safar banaya jaa.e
faraz-e-dar pe kar ke buland aḳhir-e-shab
mire hi sar ko nishan-e-sahar banaya jaa.e
bahut tavil hua silsila raqabat ka
kabhi milo to use muḳhtasar banaya jaa.e
qadam qadam pe hai basti men vahshiyon ka hujum
chalo kahin kisi sahra men ghar banaya jaa.e
zamir-e-nau-e-bashar kab se ho chuka ruḳhsat
na.e ḳhamir se taaza bashar banaya jaa.e
mafar muhal hai qaid-e-makan se jab ‘irfan’
to kyuun na phir isi gumbad ko ghar banaya jaa.e
Leave a Reply