mauja-e-reg-e-ravan-e-gham men bah ke dekhna
muflisi men doston ke saath rah ke dekhna
daman-e-iz.har men jazbe sama sakte hain nahin
baat phir bhi baat hai ik baar kah ke dekhna
ḳhud ko miTTi ka gharaunda farz hi karna nahin
andhiyon ki zad men rahna aur Dhah ke dekhna
dil ke sannaTe men ḳhushbu ke dariche khul ga.e
dastakon ke phuul darvaze pe mahke dekhna
kasa-e-fitrat men phir ḳhvahish ke sikke baj uThe
phir parinde saans ki Daali pe chahke dekhna
be-asar hi kyuun na ho par apni zaati soch ho
dosto taḳhliq-e-fan ka karb sah ke dekhna
badshahat ke maze hain ḳhaksari men ‘salim’
ye nazara yaar ke kuche men rah ke dekhna
Leave a Reply