Aftab Shamsi
azurdagi ka us ki zara mujh ko paas tha
main varna aaj us se zyada udaas tha
suraj nahin tha duur sava neze se magar
meri ana ka saaya mire aas paas tha
ab aa ke so gaya hai samundar ki god men
dariya men varna shor hi us ki asaas tha
ruhen uthin gale milin vapas chali gaiin
is raaz ke chhupane ko tan par libas tha
padh kar jise ubharne lagen an-ginat saval
aise hi ik fasane ka vo iqtibas tha
ab aa ke barf pighli hai kuchh e’tiqad ki
jis ko yaqin samajhte rahe ham qayas tha
Leave a Reply