Tujhe Kho Kar Kisi Se Pyar Hona Chahiye Tha

tujhe kho kar kisī se pyaar honā chāhiye thā

hameñ itnā to duniyā-dār honā chāhiye thā

abhī tak khul nahīñ paayā ki terī dāstāñ meñ

hamārā kaun sā kirdār honā chāhiye thā

kisī ke faisle ko mustarad karne se pahle

hameñ bhī ġhair jānib-dār honā chāhiye thā

kahāñ tak us kināre par raheñge ham ki ab to

ye dariyā bhī kahīñ se paar honā chāhiye thā

badalnī chāhiye thī ḳhaak kī tāsīr ‘shahzād’

hamāre ḳhuun ko talvār honā chāhiye thā

Leave a Comment