Taghaful Aur Karam Donon Barabar Kaam Karte The

taghaful aur karam donon barabar kaam karte the

jigar ke zaḳhm bharte the to dil ke daagh ubharte the

ḳhuda jaane hamen kya tha ki phir bhi un pe marte the

jo din bhar men hazaron va.ade karte the mukarte the

na puchho un ki tasvir-e-ḳhyali ki sajavaT ko

udhar dil rang deta tha idhar ham rang bharte the

mohabbat ka samundar us ki maujen ai ma.az-allah

dil itna Dubta jaata tha jitna ham ubharte the

ajab kuchh zindagani ho ga.i thi hijr men apni

na hanste the na rote the na jiite the na marte the

shahidan-e-vafa ki manzilen to ye are to ye

vo rahen band ho jatin thiin jin par se guzarte the

na puchho us ki bazm-e-naz ki kaifiyyaten ‘manzar’

hazaron baar jiite the hazaron baar marte the