yaar bhi raah ki divar samajhte hain mujhe
main samajhta tha mire yaar samajhte hain mujhe
jaḌ ukhaḌne se jhukav hai miri shaḳhon men
duur se log samar-bar samajhte hain mujhe
kya ḳhabar kal yahi tabut mira ban jaa.e
aap jis taḳht ka haqdar samajhte hain mujhe
nek logon men mujhe nek gina jaata hai
aur gunahgar gunahgar samajhte hain mujhe
main to ḳhud bikne ko bazar men aaya hua huun
aur dukan-dar ḳharidar samajhte hain mujhe
main badalte hue halat men Dhal jaata huun
dekhne vaale adakar samajhte hain mujhe
vo jo us paar hain is paar mujhe jante hain
ye jo is paar hain us paar samajhte hain mujhe
main to yuun chup huun ki andar se bahut ḳhali huun
aur ye log pur-asrar samajhte hain mujhe
raushni banTta huun sarhadon ke paar bhi main
ham-vatan is liye ghaddar samajhte hain mujhe
jurm ye hai ki in andhon men huun ankhon vaala
aur saza ye hai ki sardar samajhte hain mujhe
laash ki tarah sar-e-ab huun main aur ‘shahid’
Dubne vaale madad-gar samajhte hain mujhe
Leave a Reply