Bataen Tum Se Kya Hum Aashiq-E-Bimar Kis Ke Hain

bataen tum se kya ham ashiq-e-bimar kis ke hain

hamare dida-e-tar talib-e-didar kis ke hain

na kyuun ham-shakl-e-bulbul madh men naghma-sara huun main

tumhin mujh ko bata do phuul se rukhsar kis ke hain

koi be-khud koi ba-khud hue teri mohabbat men

jo hain ghafil vo kis ke hain jo hain hoshyar kis ke hain

utha kar haath men tasbih mujh se dil ye kahta hai

barahman kis ke hain ham sahib-e-zunnar kis ke hain

na kyuun bahr-e-shahadat sar jhukaen shauq se ashiq

basan-e-tegh kahiye abru-e-khamdar kis ke hain

kaha ye tair-e-dil ne ulajh kar zulf-e-pur-kham men

phansaya kis ne mujh ko aur ye kirdar kis ke hain

nahin maalum zakhmi ho gaya hai kaun shaidai

gul-e-taza ‘jamila’ zakhm-e-daman-dar kis ke hain

Leave a Comment