Wasiyyat

mire bete miri ankhen mire baad un ko de dena

jinhon ne ret men sar gaad rakkhe hain

aur aise mutmain hain jaise un ko

na koi dekhta hai aur na koi dekh sakta hai

magar ye vaqt ki jasus nazren

jo pichha karti hain sab ka zamiron ke andhere tak

andhera nuur par rahta hai ghalib bas savere tak

savera hone vaala hai

(2)

mire bete miri ankhen mire baad un ko de dena

kuchh andhe surma jo tiir andhere men chalate hain

sada dushman ka siina takte ḳhud zaḳhm khate hain

laga kar jo vatan ko daav par kursi bachate hain

bhuna kar khote sikke dharm ke jo pun kamate hain

jata do un ko aise thag kabhi pakde bhi jaate hain

(3)

mire bete unhen thodi si ḳhuddari bhi de dena

jo hakim qarz le ke is ko apni jiit kahte hain

jahan rakhte hain sona rehn ḳhud bhi rehn rahte hain

aur is ko bhi vo apni jiit kahte hain

sharik-e-jurm hain ye sun ke jo ḳhamosh rahte hain

qusur apna ye kya kam hai ki ham sab un ko sahte hain

(4)

mire bete mire baad un ko mera dil bhi de dena

ki jo shar rakhte hain siine men apne dil nahin rakhte

hai un ki astin men vo bhi jo qatil nahin rakhte

jo chalte hain unhin raston pe jo manzil nahin rakhte

ye majnun apni nazron men koi mahmil nahin rakhte

ye apne paas kuchh bhi faḳhr ke qabil nahin rakhte

taras kha kar jinhen janta ne kursi par bithaya hai

vo ḳhud se to na utthenge unhen tum hi utha dena

ghatai hai jinhon ne itni qimat apne sikke ki

ye zimma hai tumhara un ki qimat tum ghata dena

jo vo phailaen daman ye vasiyyat yaad kar lena

unhen har chiiz de dena par un ko vote mat dena

Leave a Comment