ye kaisa daur ye kaisi sadi hai
jidhar dekho hujum-e-be-dili hai
bas itni si hamari zindagi hai
savera aa gaya raat aa rahi hai
vahi shab hai vahi bara-dari hai
chala aa tu ki bas teri kami hai
charaghon ne na jaane kah diya kya
hava dahliz par Thahri hui hai
sahar-dam qatl ho ja.ega suraj
tabhi ye raat bhi sahmi hui hai
chalo is peḌ ke nazdik dekho
mahak si kuchh lahu ki aa rahi hai
tire chehre ki nuz.hat dekh li kya
shagufta kyon chaman ki har kali hai
abhi sairab ho ja.enge ham log
vo dekho samne bahti nadi hai
koi ghar chhoḌ kar hai jaane vaala
dariche se udasi jhankti hai
sitare dam-ba-ḳhud hain chand ḳhamosh
suhani raat ruḳhsat ho rahi hai
jahan chhiḌte the ḳhushiyon ke tarane
‘mujib’ us ghar pe qabiz ḳhamushi hai
Leave a Reply