Poet
mata-o-mal na de daulat-e-tabahi de
mujhe bhi mumlikat-e-gham ki badshahi de
khaḌa hua huun main dast-e-talab daraz kiye
na mere sar ko yuun ilzam-e-kaj-kulahi de
main apne aap ko kis tarah sangsar karun
mire ḳhilaf mira dil agar gavahi de
main Thahre paani ki manind qaid huun ḳhud men
koi nasheb ki janib mujhe baha hi de
mire dinon ko javan jism ka ujala de
miri shabon ko ghani zulf ki siyahi de
kabhi to lazzat-e-kam-o-dahan do-bala kar
ham aise faqa-kashon ko bhi murgh-o-mahi de
har ek daur ke suqrat ka ye virsa hai
mujhe bhi la miri zahrab ki surahi de
Leave a Reply