Masruf Rahguzar Pe Chala Ja Raha Tha Main

masruf rahguzar pe chala ja raha tha main

phir kyuun laga ki sab se juda ja raha tha main

taamir-e-zat hi men lagi zindagi tamam

khaliq bana raha tha bana ja raha tha main

hasil thiin jin ko rahaten vo bhi fana hue

kyuun apni muflisi se dara ja raha tha main

dariya-e-zist ki yahi manzil thi akhiri

ik bahr-e-be-karan men gira ja raha tha main

samjha tha aaine men mira aks hi nahin

zahir tha aur sab se chhupa ja raha tha main

pahle to ku-e-yar ki phir daar ki talab

daldal men khvahishon ki dhansa ja raha tha main

main gard-e-rah tha magar eajaz dekhiye

har karvan ke saath uda ja raha tha main

rukne men dar ye tha ki tavazun bigad na jaae

‘adil’ isi guman men chala ja raha tha main