maslak-e-ishq men jaa.ez hai jafa rahne de
mujh ko mahbub ki chaukhaT pe paḌa rahne de
alam-e-naza.a men saaya ho ghani zulfon ka
apne chehra pe nigahon ko jama rahne de
ham ne kanTon se nikala hai adab ko zalim
halqa-e-zauq ko phulon se saja rahne de
teri nazron se chala tiir laga hai dil par
is bahane hi sahi phuul khila rahne de
naam lena bhi hai dubhar ye vafa kaisi hai
shaaq hai dil pe bahut aisi saza rahne de
mere zaḳhmon ka mudava hai dua.en teri
kam se kam naam hi honTon pe saja rahne de
teri muskan men pinhan hai hamari hasti
apne honTon pe tabassum ko zara rahne de
aks ankhon men basane ki ijazat de de
apni yadon ka diya dil men jala rahne de
dosh-e-makkar uTha.e jo janaza mera
is se behtar hai ki maqtal men paḌa rahne de
mashrab-e-did ka shaida.i ‘falak kahta hai
jam-e-ulfat men tamanna ko mila rahne de
Leave a Reply