Shahid Kamal
ḳhud mujh ko mere dast-e-kaman-gir se mila
jo zaḳhm bhi mila hai usi tiir se mila
tujh ko ḳhabar bhi hai mire inkar ka javab
tegh-o-sinan-o-ḳhanjar-o-shamshir se mila
gum ho gaya tha main usi dasht-e-vajud men
main apne ism-e-zat ki tasḳhir se mila
ai ramz-e-agahi main tujhe ḳhud pe va karun
vahshat ko mere paaon ki zanjir se mila
milne ki kuchh ḳhushi na bichhaḌne ka ḳhauf hai
ai meri jaan tu baḌi taḳhir se mila
dariya tamam tishna-labon ki hai milkiyyat
is mumlikat ko pyaas ki jagir se mila
jo ḳhvab meri chashm-e-zarurat ne kho diya
vo ḳhvab mere ḳhvab ki ta.abir se mila
‘shahid’ mire mizaj ki ashuftagi na dekh
meri udasiyon ka nasab ‘mir’ se mila
Leave a Reply