fida allah ki ḳhilqat pe jis ka jism o jaan hoga
vahi afsana-e-hasti ka mir-e-dastan hoga
yaqin jis ka kalam-e-quds ajr-ul-mohsinin par ho
niko-kari ka us ki qaa.el ik din kul jahan hoga
hayat-e-javedani pa.ega vo ishq-e-sadiq men
jo anqa ki tarah madum hoga be-nishan hoga
safar rah-e-mohabbat ka chahal-qadmi samajhte ho
abhi dekhoge tum ik ik qadam par haft-ḳhvan hoga
hamen gulzar-e-jannat hai azizo bagh-e-dil apna
samajhte ho ki jan-parvar hai sehn-e-gulistan hoga
jo isar aur hamdardi shi.ar apna bana loge
to kanTa bhi tumhen rashk-e-gul-e-bagh-e-jinan hoga
ye qissa sham.a o parvane ka bas ma-vasha tak hai
vo ho ja.ega bazm-ara to phir koi kahan hoga
ada-e-farz bar-haq par khapa do dosto jaan tak
ye vo sauda hai aḳhir ko nahin jis men ziyan hoga
azal se va.izo ke qaul duniya sunti aa.i hai
amal ka vaqt bhi koi kabhi ai mehrban hoga
taghaful aur sitam ke badle hai andaz dildari
sambhal ai shauq-e-be-payan tira ab imtihan hoga
tahi-dastan-e-qismat ko to dam lena qayamat hai
yahan kuchh ho gaya insaf-e-ashiq jo vahan hoga
na samjho khel is ko bazm ‘kaifi’ men vo jaadu hai
yahan gar zahid-e-ḳhushk aa.ega pir-e-mughan hoga
Leave a Reply