bahane DhunD na yuun ham se duur jaane ke
ga.e jo duur to phir paas ham na aane ke
nazar mila ke yakayak nazar jhuka lena
tariqe ḳhuub nikale hain hosh uḌane ke
gulon pe rang chaḌha hai mahak rahi hai faza
ki mausam aa ga.e kaliyon ke naaz uThane ke
namak liye hue phirte hain log muTThi men
jigar ke zaḳhm kisi ko na ham dikhane ke
piya hai ham ne miyan ghaaT ghaaT ka paani
har ek taur se vaqif hain ham zamane ke
main kaam is liye leta huun darguzar se janab
ki din rahe na mire astin chaḌhane ke
ai ‘shad’ khul ga.i ham par jahan ki asliyyat
kisi ke jhanse men ab ham kabhi na aane ke
Leave a Reply