Jahangeer Nayab
markaz men tha so dhyan men rakkha gaya mujhe
har vaqt imtihan men rakkha gaya mujhe
is ke siva nahin hai masiha mira koi
ik umr is guman men rakkha gaya mujhe
atraf mere khincha gaya ḳhauf ka hisar
Dahte hue makan men rakkha gaya mujhe
meri zaban se quvvat-e-goya.i chhin kar
gungon ki dastan men rakkha gaya mujhe
jauhar-shanas nazron se ojhal nahin tha main
kyuun ko.ele ki kaan men rakkha gaya mujhe
pahre biTha diye ga.e har baat par miri
danton tale zaban men rakkha gaya mujhe
achchha mazaq hai ye miri sadgi ke saath
fashion-zada dukan men rakkha gaya mujhe
karna hi tha sipurd jo qatil ko ek din
is darja kyon amaan men rakkha gaya mujhe
charon taraf se mujh pe zamin tang ki ga.i
kahne ko asman men rakkha gaya mujhe
talvar ka saval yahi jang-ju se tha
kyuun aaj tak miyan men rakkha gaya mujhe
harakat pe hai jumud to iz.har par sukut
‘nayab’ kis jahan men rakkha gaya mujhe
Leave a Reply