zamana aaya hai be-hijabi ka aam didar-e-yar hoga
sukut tha parda-dar jis ka vo raaz ab ashkar hoga
guzar gaya ab vo daur-e-saqi ki chhup ke piite the piine vaale
banega saara jahan mai-khana har koi bada-khvar hoga
kabhi jo avara-e-junun the vo bastiyon men phir aa basenge
barahna-pai vahi rahegi magar naya kharzar hoga
suna diya gosh-e-muntazir ko hijaz ki khamushi ne akhir
jo ahd sahraiyon se bandha gaya tha phir ustuvar hoga
nikal ke sahra se jis ne ruuma ki saltanat ko ulat diya tha
suna hai ye qudsiyon se main ne vo sher phir hoshiyar hoga
kiya mira tazkira jo saaqi ne bada-khvaron ki anjuman men
to pir-e-mai-khana sun ke kahne laga ki munh-phat hai khvar hoga
dayar-e-maghrib ke rahne vaalo khuda ki basti dukan nahin hai
khara jise tum samajh rahe ho vo ab zar-e-kam-ayar hoga
tumhari tahzib apne khanjar se aap hi khud-kushi karegi
jo shakh-e-nazuk pe ashiyana banega na-paedar hoga
safina-e-barg-e-gul bana lega qafila mor-e-na-tavan ka
hazar maujon ki ho kashakash magar ye dariya se paar hoga
chaman men laala dikhata phirta hai daagh apna kali kali ko
ye janta hai ki is dikhave se dil-jalon men shumar hoga
jo ek tha ai nigah tu ne hazar kar ke hamen dikhaya
yahi agar kaifiyat hai teri to phir kise e’tibar hoga
kaha jo qumri se main ne ik din yahan ke azad pa-ba-gil hain
tu ghunche kahne lage hamare chaman ka ye razdar hoga
khuda ke ashiq to hain hazaron banon men phirte hain maare maare
main us ka banda banunga jis ko khuda ke bandon se pyaar hoga
ye rasm-e-bazm-e-fana hai ai dil gunah hai jumbish-e-nazar bhi
rahegi kya aabru hamari jo tu yahan be-qarar hoga
main zulmat-e-shab men le ke niklunga apne dar-manda karvan ko
sharar-fishan hogi aah meri nafas mira shola-bar hoga
nahin hai ghair-az-numud kuchh bhi jo muddaa teri zindagi ka
tu ik nafas men jahan se mitna tujhe misal-e-sharar hoga
na puchh ‘iqbal’ ka thikana abhi vahi kaifiyat hai us ki
kahin sar-e-rah-guzar baitha sitam-kash-e-intizar hoga
Leave a Reply