maqdur kya mujhe ki kahun vaan ki yaan rahe
hain chashm-o-dil ghar us ke jahan chahe vaan rahe
misl-e-nigah ghar se na bahar rakha qadam
phir aa.e har taraf ye jahan ke tahan rahe
ne but-kada se kaam na matlab haram se tha
mahv-e-ḳhayal-e-yar rahe ham jahan rahe
jis ke ki ho naqab se bahar shua-e-husn
vo ru-e-aftab ḳhajil kab nihan rahe
aa.e to ho pa dil ko tasalli ho tab mire
itna kaho ki aaj na javenge haan rahe
hasti hi men hai sair-e-adam us ko yaan jise
fikr-e-miyan-e-yar o ḳhayal-e-dahan rahe
ghibat hi men hai us ki hamara zuhur yaan
vo jalva-gar jab aage hua ham kahan rahe
‘bedar’ zulf khinche idhar chashm-e-yar udhar
hairan hai dil kahan na rahe kis ke haan rahe
Leave a Reply