Qaisar Siddiqi
ilzam kuchh na kuchh to mire sar bhi aa.ega
angan men peḌ hoga to patthar bhi aa.ega
suraj ke ghusl karne ka manzar bhi aa.ega
in jangalon ke ba.ad samundar bhi aa.ega
saman jarahaton ke bhi ham saath le chalen
is raste men shahr-e-sitamgar bhi aa.ega
vo saanp jis ko duudh pilati hai dushmani
thaili se ek roz vo bahar bhi aa.ega
palkon pe apni ḳhvab-e-tajalli saja.iye
shaam aa.i hai to raat ka lashkar bhi aa.ega
jo saaya khelta hai abhi meri god men
ik din vo mere qad ke barabar bhi aa.ega
is dopahar ki dhuup ko shayad ḳhabar nahin
sahra men koi mom ka paikar bhi aa.ega
jab tum nahin to us ka bhi kya kaam hai yahan
tum aaoge to bazm men ‘qaisar’ bhi aa.ega
Leave a Reply