Pritpal Singh Betab
manzar-e-sarv-o-saman yaad aaya
phir se gum-gashta vatan yaad aaya
pichhe ab kya hai ghubar-e-rafta
dahr men bagh-e-adan yaad aaya
bal-o-par TuuT chuke the jis vaqt
hamen parvaz ka fan yaad aaya
phir kisi shaḳh pe koyal boli
phir tira rang-e-suḳhan yaad aaya
avval ik shaḳhs ki yaad aa.i bahut
do.em ik saanp ka phan yaad aaya
ek din socha ki ujle ho jaa.en
tan ko dhoya tha ki man yaad aaya
ḳhuun sa rah gaya dil men jo shaḳhs
aaj phir ban ke chubhan yaad aaya
phir se dil Duub raha hai ‘betab’
phir zamane ka chalan yaad aaya
Leave a Reply