malum agarche hai ki mausam ye kaḌa hai
dil phir bhi gulabon ke liye zid pe aḌa hai
yaad aa.e hain phir log mujhe shahr-e-jafa ke
ik tir-e-sitam yuun bhi mere dil men gaḌa hai
vo jis se ibadat ki tarah ki thi mohabbat
vo shaḳhs zamane ke liye mujh se laḌa hai
mayyat ko miri dekh ke bola vo sitamgar
uTh ja.ega phir se ye adakar baḌa hai
jis moḌ pe badli thi Dagar us ne ‘mubarak’
kahna ki usi moḌ pe divana khaḌa hai
Leave a Reply