Riaz Majeed
makan-e-dil se jo uThta tha vo dhuan bhi gaya
bujhi jo atish-e-jan ziist ka nishan bhi gaya
bahut panah thi us ghar ki chhat ke saa.e men
vahan se nikle to phir sar se asman bhi gaya
baḌha kuchh aur tajassus jala kuchh aur bhi zehn
haqiqaton ke ta.aqub men main jahan bhi gaya
rahe na saath jo pachhtave bhi to ranj hua
ki hasil-e-safar-e-umr-e-ra.egan bhi gaya
bachche hue the to ek ek lamha ginte the
bikhar ga.e to phir andaza-e-zaman bhi gaya
nishan tak na raha apne gharq hone ka
dikha.i deta tha jo ab vo badban bhi gaya
bhara tha daman-e-ḳhvahish to hashr barpa tha
hua tahi to phir avaza-e-sagan bhi gaya
ab is udaas haveli se apna kya rishta
makin ke saath hamare liye makan bhi gaya
bisat-e-dahr pe shah-mat ho ga.i ham ko
‘riyaz’ vo bhi na haath aaya naqd-e-jan bhi gaya
Leave a Reply