Poet
majbur to bahut hain mohabbat men ji se ham
ye aur baat hai na kahen kuchh kisi se ham
ik shaam ham-suḳhan the chaman men kali se ham
yadash-ba-ḳhair phir na mile zindagi se ham
allah re vo vaqt vo majburi-e-hayat
ro ro ke ho rahe the juda jab kisi se ham
taklif-e-iltifat na kar ai nigah-e-naz
ab mutma.in hain apne gham-e-zindagi se ham
hain yaad us nazar ki taghaful-shi.ariyan
ba-vasf-e-irtibat bhi the ajnabi se ham
baḌhti hi ja rahi hain abas bad-gumaniyan
na-ashna nahin hain tiri barhami se ham
ek ik ada-e-husn-e-gurezan nazar men hai
pamal ho rahe hain baḌi be-ruḳhi se ham
har-su hai ek alam-e-vahshat shab-e-firaq
ghabra rahe hain silsila-e-tirgi se ham
gharat kiya hai jis ne hamara sukun-e-dil
‘muztar’ sukun-e-dil ke hain ḳhvahan usi se ham
Leave a Reply