main ne roka bahut par ga.e sab ke sab
jaane phir kya hua Dar ga.e sab ke sab
dost kya ab to dushman bhi mafqud hain
baat kya hai kahan mar ga.e sab ke sab
har-qadam par zamana muḳhalif raha
kaam apna magar kar ga.e sab ke sab
din men suraj ke the ham-safar din Dhale
le ke mayusiyan ghar ga.e sab ke sab
peḌ sukhe the qudrat bhi thi mehrban
aaj phal-phul se bhar ga.e sab ke sab
kya ḳhata thi kisi ne bataya nahin
mujh pe ilzam kyuun dhar ga.e sab ke sab
aap tanha bache hain miri bazm men
varna ‘javed’-aḳhtar ga.e sab ke sab
Leave a Reply