main ne duniya men faqat dekhe hain jaane vaale
main ne dekhe hi nahin hain kabhi aane vaale
rote rote mire dil se jo sada aati hai
rone lag jaate hain phir mujh ko manane vaale
jab koi chhoḌ ke jaata hai to dil kahta hai
kya kabhi lauT ke aate hain ye jaane vaale
ham jo be-ghar hain hamen ḳhuub samajh aata hai
kis nazar se hamen takte hain Thikane vaale
baaqi rahta nahin hai kuchh bhi siva-e-gham ke
raakh tak luuT ke lete hain jalane vaale
roz-o-shab maar diya jaata hai ‘faisal’ ham ko
chain se jiine nahin dete zamane vaale
Leave a Reply