Maine Bithla Ke Jo Pas Usko Khilaya Bida

main ne bithla ke jo paas us ko khilaya biida

qatl par mere raqibon ne uthaya biida

mushtail ta-ba-falak atish-e-pur-dud hui

mal ke jis vaqt misi tum ne chabaya biida

surkh-ru ho ke ye kis munh se tu ab bole hai

main ne kis roz tire haath se paaya biida

meri aur aap ki majlis men bigad jaegi

tum ne dene ko kisi ke jo banaya biida

sabz-bakhti kahun kya apni ki vo jaan gaya

padh ke afsun men khilane ko jo laaya biida

laal kar dunga abhi bazm men munh kitnon ke

haath se tu ne kisi ko jo khilaya biida

ai ‘nasir’ us ke gale ka huun na main kyunkar haar

aaj gul-ru ne mujhe dekh chabaya biida

Leave a Comment