Kuchh Ajab Aan Se Logon Mein Raha Karte The

Shaz Tamkanat

kuchh ajab aan se logon men raha karte the

ham ḳhafa ho ke bhi aapas men mila karte the

itni tahzib-e-rah-o-rasm to baaqi thi ki vo

laakh ranjish sahi va.ada to vafa karte the

us ne puchha tha ka.i baar magar kya kahte

ham mizajan hi pareshan raha karte the

ḳhatm tha ham pe mohabbat ka tamasha goya

ruuh aur jism ko har roz juda karte the

ek chup-chap lagan si thi tire baare men

log aa aa ke sunate the suna karte the

teri surat se ḳhuda se bhi shanasa.i thi

kaise kaise tire milne ki dua karte the

us ko ham-rah liye aate the meri ḳhatir

mere gham-ḳhvar mire haq men bura karte the

zindagi ham se tire naaz uTha.e na ga.e

saans lene ki faqat rasm ada karte the

ham baras paḌte the ‘shaz’ apni hi tanha.i par

abr ki tarah kisi dar se uTha karte the