ghair ke dil pe tu ai yaar ye kya bandhe hai
hai vo ik bad-farosh aur hava bandhe hai
bul-havas jama-e-uryani-e-ushshaq ko dekh
tu gareban se kyuun apna gala bandhe hai
yuun sharar chhidti hain jaise ki havai hai chhuti
ik saman aah miri ta-ba-sama bandhe hai
dil-e-sar-gashta bhi to ek bala men hai phansa
kabhi kholi hai kabhu zulf-e-dota bandhe hai
ye to tujh se na hua aave shab-e-tar men yaar
taar shikvon hi ka tu sub.h-o-masa bandhe hai
dekh kar toda gale ka koi dil deta hai
munDchara-pan se tu kyuun apna gala bandhe hai
bevafa manda ki rakkhi to na tujh paas rahun
kya karun paanv mira dast-e-vafa bandhe hai
naf-e-ahu men na kis tarah se ja kar vo chhupe
mushk ki mushkin tiri zulf-e-rasa bandhe hai
ek jhagadalu ki duḳhtar pe hua hai ashiq
dil mira jaan ke jhagde ki bina bandhe hai
jab jafa se tiri hota huun ḳhafa ghusse se
tuktuki meri taraf mehr-e-vafa bandhe hai
jab kaha main ne ki juude ko miri jaan tu bandh
band mahram ke main bandhunga tu kya bandhe hai
khol kar balon ko ashufta-o-barham ho kar
tere kahne se kaha meri bala bandhe hai
sahl ye taur hai ‘ehsan’ ghazal ik aur bhi likh
hai khula sab pe tu mazmun bandha bandhe hai