Bashir Badr
hamare paas to aao bada andhera hai
kahin na chhod ke jaao bada andhera hai
udaas kar gae be-sakhta latife bhi
ab ansuon se rulao bada andhera hai
koi sitara nahin pattharon ki palkon par
koi charagh jalao bada andhera hai
haqiqaton men zamana bahut guzar chuke
koi kahani sunao bada andhera hai
kitaben kaisi utha laae mai-kade vaale
ghazal ke jaam uthao bada andhera hai
ghazal men jis ki hamesha charagh jalte hain
use kahin se bulao bada andhera hai
vo chandni ki basharat hai harf-e-akhir tak
‘bashir-badr’ ko laao bada andhera hai
Leave a Reply